craigieboy
In die verlede is geglo dat mense wat die meeste dinge ervaar het, die mees gevorderd is in jare, of die meeste opvoeding ontvang het, dié is met die meeste wysheid.
Vir dekades lank is individue uitgsonder as draers van kennis wanneer hulle die wysheid het om te besluit oor wat reg of verkeerd is. Die siening het dus gedraai oor ek en jy elkeen met ons eie kennis, waarvan ons die draers is.
Tog is daar niks so wys nie, soos om deel te wees van ‘n groeiende, dinamiese groep mense, ‘n gemeenskap wat intiem betrokke is by mekaar, wat insprake het in mekaar se lewens en wat deur liefde elke aksie toets aan die hand van opbouende terugvoering van die groep waaraan hulle behoort.
Die Westerse samelewing waarvan ons deel is het die persepsie op die tafel geplaas dat wysheid verkry en beoefen kan word op jou eie, maar eintlik word daar al hoe meer besef dat die geheim van wysheid verborge is in die konsep van saam wees, en nie in die idee van individuele studie of persoonlike kennis nie.
Die kern van ware wysheid is dus verhoudingsgedrewe!
Wanneer ons vanuit ons godsdienstige perspektief oor wysheid dink, dan besef ons dat wysheid nie maar net van ons self af kan kom nie. God is die die draer en die gewer van wysheid. Sonder God sou ons kennis niks beteken het nie!
Die wese van die kerk en christenskap in opsig self is tog om verhoudingsgedrewe te wees en as ‘n groep te funksioneer, en nie individueel nie. Juis hierdie hart van God wat wil hê dat ons deel moet wees van Sy groep, maak ook dat ons, ons wysheid binne in hierdie groep moet deel, en nie vir ons self hou nie. Dit is ware wysheid, die wysheid wat oorgedra kan word aan ander en vir hulle ook van betekenis kan wees.
Natuurlik kom wysheid ook met groot verantwoordelikheid. Wanneer mens besef dat jy wysheid het kan dit so maklik gebeur dat daardie wysheid verkeerdelik aangewend word. Dit is dan wanneer mense hul wysheid gebruik om skade aan te rig eerder as om dit opbouend te gebruik. God gee tog vir ons wysheid om Sy Koninkryk ‘n beter plek te maak.
Op die ou einde van die dag as ons wysheid sien as deel van ‘n verhoudings netwerk, dan sal ons weerhou word daarvan om besluite te neem wat lei tot emosionele bankrotskap, en eventuele self vernietiging.
Om intelligent te leef het min te make met akademiese kwalifikasies of breinkrag. Ten diepste het wysheid te make daarmee om ander intiem te ken, om ons self toe te laat om deel van ‘n vervlegte gemeenskap te wees, en laasten om ons self oop te maak sodat ons geken kan word deur ander, en God self.
“The stupidest thing you can do in this life, is to try and live it by yourself!”
(Met verwysing na Mynhardt F van Pletsen : http://mynhardtvanpletsen.me/ )
